“Qarabağ” oyunu əks hücum taktikası üzərində qurarsa, daha uğurlu olacaq

Bakıda “Qarabağ” və Almaniyanın “Bayer 04” komandaları arasında UEFA Avropa Liqasının qrup mərhələsinin IV turunun oyunu keçiriləcək. Bu qarşılaşma İngiltərədən olan hakimlər briqadasına tapşırılıb. FIFA referisi Kreyq Pousona Saymon Bennett və Lee Bets kömək göstərəcək. Dördüncü hakim funksiyasını Con Bruks yerinə yetirəcək. VAR-da avstriyalı Carred Cillett, AVAR-da isə Mixael Salisburi olacaq.

Bəs komandaların şansı ekspertlər tərəfindən necə dəyərləndirilir?

Bununla bağlı “MediaPost”a açıqlama verən futbol şərhçisi Elmar Rza bildirib ki, “Qarabağ” “Bayer Leverkusen”lə cavab matçında daha ehtiyatlı oyuna üstünlük verməlidir. Onun fikrincə, Ağdam təmsilçisi oyunu əks hücum taktikası üzərində qurarsa, daha uğurlu olacaq:

“Biz birinci matçda gördük ki, rəqibin təklif etdiyi açıq oyuna getmək bir növ intihara bərabərdir və bu da böyük hesablı məğlubiyyətlə nəticələndi. “Qarabağ” cavab oyununda bundan müəyyən dərəcədə nəticə çıxartmalıdır. Həmçinin rəqib heyətin çox güclü olduğu qəbul olunandır. Sadəcə burada arzulamaq lazımdır ki, rəqib günündə olmasın. Ağdam klubunun müdafiədə daha etibarlı oyun göstərməsi ilə bu oyundan xalla ayrılması mümkün ola bilər və bu qazanılacaq xal “Qarabağ”ın qrupdan çıxmasında çox önəmli rol daşıyacaq”.

E.Rza belə rəqiblərlə oynamağın çətin olduğunu vurğulayıb: “Amma bu tip rəqiblərlə oynamaq lazımdır ki, müəyyən dərəcədə inkişaf edəsən. Çempionlar Liqasının qrup mərhələsində, həmçinin pleyoflardakı oyunlara hazırlıq məhz belə matçlardan asılı olur. “Beleverkuzen” hazırda nəinki Almaniyanın, məncə, top beş liqaların içərisində ən formada olanlardan biridir. Üç həmin formada olan klub varsa, mən düşünürəm ki, biri  Xabi Alonsonun çalışdırdığı komandadır. Bu komanda ilə oyun inkişaf və oyunçuların böyüməsi baxımından da önəmlidir”.

Qeyd edək ki, noyabrın 9-da Tofiq Bəhramov adına Respublika stadionunda reallaşacaq görüş saat 21:45-də başlayacaq.

Sevinc İbrahimzadə