Azərbaycan idmanında 2023-cü ilin ən yaxşıları bəlli olub. Gənclər və İdman Nazirliyinin təşkilatçılığı ilə keçirilən Qala mərasimdə “Qarabağ” müxtəlif nominasiyalarda ən yaxşılar sırasında yer alıb.
Buna komandamızın il ərzində qazandığı nailiyyətlər səbəb olub. Klubumuz 2022/23 mövsümündə Azərbaycan çempionu adını 10-cu dəfə qazanıb. Ardıcıl 10-cu dəfə avrokubokların qrup mərhələsinə yüksələn “Qarabağ” Avropa Liqasında da tarixi uğura imza atıb. Komandamız bu turnirin pley-off mərhələsinə yüksələn ilk Azərbaycan klubu kimi tarixə düşüb.
Bu uğurların nəticəsində “Qarabağ” İlin ən yaxşı kişi komandası seçilib. Mükafat klubumuzun prezidenti Tahir Gözelə təqdim olunub.
Komandamızın baş məşqçisi Qurban Qurbanov iki mükafata layiq görülüb. Təcrübəli mütəxəssisimiz İlin ən yaxşı məşqçisi adını qazanıb. Baş məşqçimiz həm də İlin Ədalətli oyun (Fair Play) mükafatı ilə təltif olunub.
Qurban Qurbanova həsr olunan “Stadionlar səssiz olanda” filmi də mükafatlandırılıb. Premyerası bu il olan film İlin ən yaxşı idman filmi nominasiyasında qalib gəlib. Klubumuz isə İlin ən yaxşı idman klubu nominasiyasında 3-cü olub.
Son şərhlər