2025-ci il Since1951 platforması üçün fəaliyyət baxımından intensiv və məhsuldar olmuşdur. İl ərzində Qarabağ FK-nın əsas komandası və akademiya kollektivlərinin ümumilikdə 120 oyunu izlənilmiş və işıqlandırılmışdır. Bu fəaliyyətlər Ağdam futbolunun həm peşəkar, həm də akademiya səviyyəsində sistemli şəkildə izlənməsinə xidmət etmişdir.
Xüsusilə akademiya komandalarının oyunlarına prioritet verilmiş, həmin görüşlərin böyük əksəriyyəti canlı yayımlar vasitəsilə futbol ictimaiyyətinə təqdim olunmuşdur. Bu yayımlar gənc futbolçuların inkişaf yolunun izlənməsi, valideynlər və mütəxəssislər üçün məlumat əlçatanlığının artırılması baxımından mühüm əhəmiyyət daşımışdır.
2025-ci il ərzində yeni və zəngin arxiv materialları formalaşdırılmışdır. Toplanan bu materiallar Ağdam futbol tarixinin sənədləşdirilməsi və gələcək nəsillərə ötürülməsi baxımından strateji əhəmiyyətə malikdir.
Since1951 platforması olaraq 2026-cı ilə daha geniş hədəflərlə daxil oluruq. Qarşıdakı dövrdə fəaliyyətin daha da təkmilləşdirilməsi, yayımların keyfiyyətinin artırılması, arxiv bazasının genişləndirilməsi və ictimaiyyətlə əlaqələrin gücləndirilməsi əsas məqsədlər sırasındadır. Yeni ilin hamı üçün uğurlu və düşərli olması arzu edilir.
Bu məqsədlərin davamlı və peşəkar şəkildə həyata keçirilməsi üçün saytın sponsor dəstəyi ilə təmin olunması prioritet hədəflərdən biridir. Potensial sponsorluq əməkdaşlığı həm Since1951-in institusional inkişafına, həm də Azərbaycan futbolunun, xüsusilə akademiya səviyyəsində təbliğinə mühüm töhfə verə bilər.
Since1951 olaraq Ağdam futboluna xidmət istiqamətində fəaliyyətimiz davamlı şəkildə davam etdiriləcəkdir.
